வாழைச்சேனை ஆட்டோ சாரதிகள் போராட்டம் (படங்கள் இணைப்பு)

100

மட்டக்களப்பு வாழைச்சேனை எரிபொருள் நிரப்பு நிலையத்தை அண்மித்துள்ள முச்சக்கரவண்டி தரிப்பிடம் தொடர்பாக வாழைச்சேனை கோறளைப்பற்று பிரதேச ஒருங்கிணைப்புக் குழுக் கூட்ட தீர்மானத்தினை நடைமுறைப்படுத்துமாறு கோரி வாழைச்சேனை கோறளைப்பற்று பிரதேச சபை முன்றலில் இன்று புதன்கிழமை ஆர்ப்;பாட்டம் நடைபெற்றது.

கறுவாக்கேணி பிரதேச முச்சக்கரவண்டி சங்கத்தின் ஏற்பாட்டில் நடைபெற்ற குறித்த ஆர்ப்பாட்டத்தில் முச்சக்கரவண்டி சாரதிகள், பிரதேச மக்கள் மற்றும் பாராளுமன்ற உறுப்பினர் சதாசிவம் வியாழேந்திரன், ஐக்கிய தேசிய கட்சி கல்குடா தொகுதி அமைப்பாளர் ஆறுமுகம் ஜெகன் உட்பட பலர் கலந்து கொண்டனர்.

வாழைச்சேனை எரிபொருள் நிரப்பு நிலையத்தை அண்மித்துள்ள முச்சக்கரவண்டி தரிப்பிடம் தொடர்பாக இரண்டு வருடங்களாக பல தமிழ் மற்றும் முஸ்லிம் முச்சக்கரவண்டி சாரதிகளுக்கிடையில் பிரச்சினைகள் நடைபெற்று வருகின்றன.

கறுவாக்கேணி கிராம சேவகர் பிரிவுக்குட்பட்ட குறித்த பகுதியில் 15 பேருக்கு முச்சக்கரவண்டி தரிப்பதற்கான அனுமதி ஆரம்பத்தில் வழங்கப்பட்டது. பின்னர் முஸ்லிம் பகுதியில் தரிப்பிடம் வழங்கப்பட்டிருந்த 6 பேர் அங்கிருந்து பிரிந்து வந்தவர்களுக்கும் அனுமதி வழங்கப்பட்டு 23 பேருக்கு குறித்த இடத்தில் வாழைச்சேனை கோறளைப்பற்று பிரதேச சபையினால் அனுமதி வழங்கப்பட்டிருந்தது.

தமிழர்களுக்கு தரிப்பிடம் வழங்கப்பட்ட இடத்திற்கு அருகாமையில் முஸ்லிம்; முச்சக்கரவண்டி சாரதிகள் அத்துமீறி இடையூறு ஏற்படும் வகையில் செயற்படுவதால் பல தடவைகள் பிரச்சினைகள் எற்பட்டுள்ளன.

இந்த நடவடிக்கைளுக்கு முற்றுப்புள்ளி வைக்குமாறு கோரி பிரதேச ஒருங்கிணைப்புக் குழு கூட்டத்தில் தெரியப்படுத்திய போது 10.07.2017 அன்று வாழைச்சேனை எரிபொருள் நிரப்பு நிலைய சுற்றுவட்டாரத்திலிருந்து மட்டக்களப்பு பாதை தமிழ் தரப்பினர் முச்சக்கரவண்டி தரிப்பித்தை பயன்படுத்த முடியும் என தீர்மானிக்கப்பட்டது.

கூட்டம் நடைபெற்று இரண்டு மாதங்கள் கடந்த நிலையிலும் வாழைச்சேனை கோறளைப்பற்று பிரதேச சபை கூட்டத்தின் தீர்மானத்தினை இதுவரை நடைமுறைப்படுத்தவில்லை. இதனைக் கண்டித்து ஆர்ப்பாட்டம் ஏற்பாடு செய்யப்பட்டிருந்தது.

அபிவிருத்திக்குழுத் தீர்மானங்களை அலட்சியம் செய்யாதே, எங்களை இனியும் ஏமாற்றாதே, 2 வருட கால இழுத்தடிப்பு இனியும் வேண்டாம், பதிவு செய்துள்ள தரிப்பிடத்தை பங்கு போட்டுக் கொடுக்காதே, எங்கள் பிரதேசத்தில் சுயமாக வாழவிடு, தமிழர் வாழ்வாதாரத்தை சூரையாடாதே, தமிழர் பிரதேசத்தை அபகரிக்காதே போன்ற வாசகங்கள் எழுதிய பதாதைகளை ஏந்தியவண்ணம் ஆர்பாட்டத்தில் ஈடுபட்டனர்.

ஆர்ப்பாட்ட இறுதியில் பாராளுமன்ற உறுப்பினர் சதாசிவம் வியாழேந்திரன், ஐக்கிய தேசிய கட்சி கல்குடா தொகுதி அமைப்பாளர் ஆறுமுகம் ஜெகன், வாழைச்சேனை கோறளைப்பற்று பிரதேச சபை செயலாளர் எம்.எஸ்.சிஹாப்தீன் ஆகியோரிடம் தமது கோரிக்கைகள் அடங்கிய மகஜரை கையளித்தனர்.

இதன் பிரகாரம் ஆர்ப்பாட்டம் கலைந்து செல்லப்பட்டதுடன், பத்து நாட்களுக்குள் பிரதேச ஒருங்கிணைப்புக் குழுக்கூட்டத்தில் வழங்கப்பட்ட தீர்மானமே எங்களுக்கு தீர்வுகளாக கிடைக்காத பட்சத்தில் நாங்கள் எங்கள் தமிழ் பகுதிகளில் முச்சக்கரவண்டிகளை பயன்படுத்துவோம். ஆனால் மற்றைய இனத்தவர்கள் எங்கள் பகுதிகளுக்கு பயணிகளை ஏற்றி வாகனத்தை கொண்டுவர முடியாது என்று சாரதிகள் தெரிவித்தனர்.

– மட்டக்களப்பு நிருபர் –

உங்கள் கருத்துக்களை பதிவிட

பகிருங்கள்..!

SHARE